Beeline Uzbekistan soxta raqamlardan qo‘ng‘iroqlarni himoya qiluvchi texnologiyani joriy etdi

Beeline Uzbekistan “anti-spoofing” texnologiyasini ishga tushirdi — bu tizim soxta raqamlardan amalga oshirilgan qo‘ng‘iroqlarni aniqlab, foydalanuvchilarni telefon firibgarligi va shaxsiy ma’lumotlar sizib chiqishidan himoya qiladi.

“Anti-spoofing” tizimi raqamning haqiqiyligini tekshiradi: agar xalqaro qo‘ng‘iroq O‘zbekiston foydalanuvchisidan emas, balki faqat mahalliy raqam (+998 prefiksi) ostida yashiringan bo‘lsa, tizim bunday qo‘ng‘iroqni avtomatik tarzda bloklaydi.

Firibgarlar soxta raqamlarni bir nechta sxemalar orqali qo‘llashadi. Masalan, ular ko‘pincha xorijdan qo‘ng‘iroq qilib, o‘zlarini O‘zbekistonlik abonentning statsionar raqami ostida yashirishadi — tizim bu mos kelmaslikni aniqlaydi va qo‘ng‘iroqni bloklaydi. Yana bir usul — go‘yoki O‘zbekiston mobil operatorlaridan biri nomidan, ammo xorijdan, roumingda qo‘ng‘iroq qilish. Tizim real vaqt rejimida SIM-karta qaysi tarmoqda ro‘yxatdan o‘tganini operator orqali tekshiradi. Agar operatorning kommutatsiya uskunasi abonent xorijiy tarmoq o‘rniga uy tarmog‘ida ro‘yxatdan o‘tganligini ko‘rsatsa, u holda qo‘ng‘iroq ham avtomatik ravishda bloklanadi.

Bunday tekshiruvlar foydalanuvchi kiruvchi qo‘ng‘iroqni qabul qilishidan avval amalga oshiriladi, bu esa firibgarlik qo‘ng‘iroqlarining sonini sezilarli darajada kamaytiradi va mobil aloqaning xavfsizligini oshiradi.

“Anti-spoofing” texnologiyasining joriy etilishi O‘zbekistonda raqamli firibgarlikka qarshi keng qamrovli dastur doirasida, Raqamli texnologiyalar vazirligi tashabbusi va ko‘magida amalga oshirildi. Yechim tarmoq darajasida ishlaydi, foydalanuvchilardan hech qanday ilova o‘rnatishni talab qilmaydi va Beeline Uzbekistan barcha foydalanuvchilari uchun avtomatik ravishda va bepul faollashtirilgan.

— Kiberxavfsizlik va ma’lumotlarni himoya qilish — bizning xizmatlar ekotizimimiz uchun muhim ustuvor yo‘nalishdir. “Anti-spoofing” texnologiyasining ishga tushirilishi mobil aloqa xavfsizligini mustahkamlaydi va foydalanuvchilarni hozirda eng keng tarqalgan telefon firibgarligi turlaridan himoya qiladi. Biz foydalanuvchilar uchun raqamli muhitni yanada ishonchli va xavfsiz qilishga xizmat qiluvchi texnologik yechimlarni rivojlantirishni davom ettiramiz, — dedi Gediz Sezgin, Beeline Uzbekistan texnologiyalar va innovatsiyalar bo‘yicha direktori.

Beeline Uzbekistan o‘z ekotizimida raqamli xizmatlarning xavfsizligini oshirish vositalarini joriy etishni, trafikni real vaqt rejimida tahlil qilishni hamda telefon va internet orqali sodir etiladigan firibgarlikka qarshi kurashish choralarini qo‘llashni davom ettirmoqda.